Prokurori i dorëhequr Ardian Nezha ka kërkuar ndihmën e institucioneve në të cilat ka qënë pjesë dikur. Ai ka denoncuar se është kërcënuar me mesazhe nga një person i identifikuar si Genti Latifi nga Peqini, i cili në fillim të 2020 i ka cuar një sërë kërcënime për jetën.
Burime bëjnë me dije se kërcënuesi i shkruante se fillimisht do të “mbaronte punë” me djalin e tij, dhe më pas me familjarët e tjerë. Gjë që e ka detyruar Nezhën që ta dërgojë të birin në Kanada. Pasi ka bërë denoncimin në organet përkatëse, Nezha ka vënë në dispozicion edhe të gjitha mesazhet e dërguara dhe kanosjet e dërguara atij dhe bashkëshortes së tij.
“Kujtove se do ishe gjithë jetën prokuror,”-shkruhet në një prej mesazheve që Nezha ka marrë në telefonin e tij. I pyetur nga prokuroria e Tiranës, Ish-magjistrati ka bërë me dije se kjo nuk është hera e parë që është kërcënuar për shkak të detyrës, dhe se ishin pikërisht këto shqetësime që e detyruan që të largohej nga detyra.
“Unë kam qenë prokuror, kam marrë shumë kërcënime dhe në 2018 edhe gjatë muajve shkurt, mars prill 2018, Aq të mëdha ishin sa u detyrova të dorëhiqem,”-u shpreh ai.
Nezha u dorëhoq në 28 mars të vitit të shkuar. Ardian Nezha është prokurori që zëvendësoi Dritan Ginën në postin e kryeprokurorit të Elbasanit në janar të vitit 2018. Vendimi u dha nga kryeprokurorja e përkohshme Arta Marku. Para se të merrte postin e kryeprokurorit të Elbasanit, Nezha ishte drejtues i komanduar i Prokurorisë së Elbasanit, post nga i cili dha dorëheqjen në prill të vitit të shkuar për t’u zëvëndësuar me Enkeleda Millonain.
