Pas lirimit të godinës nga stafi diplomatik, forcat RENEA dhe njësia e Anti-terrorit kanë hyrë në ambasadën e Iranit për të ushtruar kontrolle.

Mësohet se pas largimit të stafit diplomatik nga ambasada, këta të fundit nuk kanë hequr flamurin e Iranit dhe kanë marrë çelësat e dyerve me vete.

Punonjësit e fundit të ambasadës iraniane, kanë mbyllur zyrat, në prag të përfundimit të afatit prej 24 orësh që kryeministri Edi Rama iu la në dispozicion për t’u larguar nga Shqipëria pasi u provua se sulmi kibernetik ndaj vendit tonë ishte kryer nga Republika Islamike e Iranit.

Në pamje shihen dy prej punonjësve të fundit të cilët kanë marrë sendet e tyre personale dhe kanë mbyllur dyert e ambasadës iraniane duke zbatuar afatin e dhënë nga qeveria shqiptare. Ndërkohë në zonën ku ndodhet ambasada iraniane, janë të vendosura forca të shumta policore.