Nënkryetari i PD, Luçiano Boci, gjatë fjalës në podium u bëri thirrje qytetarëve të vijojnë betejën, për të mposhtur regjimin e kryeministrit Edi Rama.

Ai tha se sot shqiptarët kanë dalë në shesh për të ardhmen e atdheut, që sipas tij është vënë në rrezik nga politikat e gabuara të kundërshtarëve politikë.

“Ajo që na ka mbledhur këtu ne shesh nuk është vetëm e sotmja, por e ardhmja e vendit tonë. Ajo që na ka mbledhur sot, është Shqipëria dhe Atdheu. Shqipëria ka burra dhe gra, që i dalin zot Atdheut dhe familjes duke luftuar dhe duke u ndeshur. E gjithë Shqipëria e ka mendjen tek ju, e gjithë Shqipëria i ka sytë dhe veshët tek ju. Të vazhdojmë betejën tonë, ta mundim të keqen që na ka pushtuar, të përmbysim regjimin”, tha ai.