Presidenti rus Vladimir Putin refuzon të pranojë se ishte Moska ajo që nisi luftën në Ukrainë.
Në një videokonferencë në një takim të Këshillit për të Drejtat e Njeriut, ai u shpreh e gjitha nisi me një “grusht shteti” në vitin 2014, kur Krimea u pushtua nga Moska.
“Rusia mund të jetë garantuesi i vetëm i integritetit territorial të Ukrainës. Por kjo varet nga udhëheqësit e rinj të Ukrainës”, tha Putin, i cili shtoi se Polonia, e cila është fqinje me Ukrainën, shpreson të pushtojë territore në perëndim të vendit.
Udhëheqësi rus nuk la pa trajtuar edhe çështjen e përdorimit të armëve bërthamore, kërcënimi i të cilave sipas tij është në rritje.
“Rusia do të konsiderojë përdorimin ne armëve bërthamore vetëm si përgjigje ndaj një sulmi. Megjithatë ndryshe nga SHBA ne nuk kemi armë bërthamore në vende të tjera. Ne kemi armët më të avancuara, por nuk duam t’i përdorim ato apo të mburremi me to”, tha Putin.
