Alarmi për bombë në aeroportin e Prishtinës ka rezultuar i rremë. Kështu ka deklaruar Policia e Kosovës në një njoftim në faqen e saj zyrtare.

Ajo thekson se njoftimi është përhapur për qëllime të caktuara pa i bërë të ditura ato, ndërsa shton se pas kontrolleve qarkullimi në aeroport ka rinisur normalisht.

Njoftimi

Aeroporti Ndërkombëtar “Adem Jashari” në Prishtinë lëshohet në qarkullim

Prishtinë, më 28 dhjetor 2022

Pas realizimit të kontrollit në objekte dhe hapësira të Aeroportit Ndërkombëtar “Adem Jashari” në Prishtinë, ka rezultuar se nuk ka ndonjë mjet shpërthyes, dhe se kanosja me mjete shpërthyese ka qenë një alarm i rremë me qëllime të caktuara.

Pas përfundimit të kontrollit dhe punëve nga institucionet relevante, funksionimi dhe qarkullimi në aeroport i është kthyer normalitetit, andaj i falënderojmë qytetarët për mirëkuptimin dhe bashkëpunimin e treguar me institucionet e Republikës së Kosovës.