Fatbardh Doda i njohur ndryshe si Fatbardh Dervishi ndodhet i burgosur në Spanjë që prej muajit gusht. Ai cilësohet si kreu i një bande që merrej rrjet kriminal, por aktivitet kryesor kishin trafikun e drogës. Sipas mediave në Spanjë, Doda ndryshonte vazhdimisht pamjen dhe qarkullonte me identitete të ndryshme false për të shmangur zbulimin.
Agjentët nga Njësia e Drogës dhe Krimit të Organizuar në Costa del Sol (Udyco) ishin në ndjekje të hapave të tij prej javësh ndërsa në fund vendosën të vepronin për ta vënë në pranga. Sapo doli nga ndërtesa ku jetonte ato ditë në fund të gushtit, hipi në makinë dhe u nis. Gjatë rrugës policia vendosi të ndërhynte për ta vënë në pranga.
Ai akuzohet si anëtar i një grupi kriminal dhe për një sërë veprash si armëmbajtje pa leje, falsifikim dokumentesh, vjedhje automjetesh. Në shtëpinë e tij, u gjet një automatik dhe dy karikatorë me kapacitet përkatësisht 16 dhe 32 gëzhoja.
Doda bashkë me anëtarët e grupit maskoheshin me uniforma policie dhe kryenin grabitje të shtëpive që shërbenin si magazina droge teksa ishin të armatosur. Ata përdorën GPS që supozohej se i kishin instaluar në automjetet e trafikantëve të drogës që donin të grabisnin për të zbuluar rrugët për në shtëpitë e tyre apo ndërtesat që mund të shërbenin si magazina droge. Ndërkohë akuzohet edhe për një plagosje me armë në Shqipëri më 3 janar të një viti më parë. Ai plagosi të dashurën e tij 23-vjeçare në një dhomë hoteli në Durrës. Në dëshminë e saj në polici, e dashura u shpreh se ishte i pirë dhe e bëri pa dashje.
