Lushnjë është veshur sot kuq e zi dhe mirëpret të gjitha aktivitetet për nder të 103- vjetorit të nisjes së punimeve të Kongresit që hodhi themelet e shtetit modern shqiptar.

Në këtë aktivitet morën pjesë autoritetet më të larta vendore e qendrore si dhe nderon me pjesëmarrjen e tij dhe Presidenti i Republikës Bajram Begaj.

Kreu i shtetit tha se Kongresi garantoi sovranitetin e vendit, ndërsa theksoi se kjo ngjarje historike duhet parë si një datë ku të gjithë pa përjashtim të punojnë për arritjet kombëtare dhe të lënë pas mëritë dhe çështjet personale.

“Kongresi i Lushnjës është një ngjarje me mjaft rëndësi historike për Shqipërinë. Është një nga momentet kyçe kur u garantua sovraniteti i Shqipërisë. U riafirmua pavarësia e Shqipërisë e shpallur në 1912. U garantua vetëqeverisja dhe mirëfunksionimi i shtetit shqiptar dhe po ashtu u aprovua statuti i Lushnjës, i cili ishte dokumenti i parë e miratuar nga delegatë mbarëkombëtarë. E shkuara duhet të kujtohet, jo vetëm për figurat e rëndësishme, por edhe si moment reflektimi, për të nxjerrë mësime e frymëzuar. Kongresi i Lushnjës na frymëzon, gjithë ata delegatë vunë interesin e Shqipërisë mbi interesin e tyre, mbi mendimet e tyre të ndryshme. Vendosën se është më e rëndësishme Shqipëria. Mendoj se edhe sot është një ditë e rëndësishme për të gjithë ne, që për sfidat aktuale duhet të bëhemi të gjithë bashkë për t’u përballur, e për të frymëzuar popullin shqiptar siç frymëzoi Kongresi i Lushnjës”, tha Begaj.