Partia Socialiste ka kërkuar përjashtimin nga Kuvendi të disa deputetëve të Partisë Demokratike. Në kërkesën e firmosur nga disa deputetë socialistë, ata kërkojnë përjashtimin e demokratëve për shkak të bllokimit të foltores dhe “fyerjes” së kryetares së Kuvendit, Lindita Nikollës.
Socialistët kërkojnë që deputetët demokratë, Luçiano Boçi, Albana Vokshi, Ina Zhupa, Luan Baçi, Tritan Shehu, Ervin Salianji, Gazmend Bardhi dhe Bledion Nallbati të përjashtohen nga punimet e Kuvendit për 10 ditë.
Kërkesa e socialistëve vjen pas tensioneve të krijuara në Kuvend një javë më parë ku demokratët kërkonin të zhvillonin një interpelancë me kryeministrin Edi Rama, për çështjen “McGonigal”.
Kreu i qeverisë nuk ishte i pranishëm duke ia deleguar interpelancën ministres Elisa Spiropali. Deputetët e PD-së e kundërshtuan këtë lëvizje të kryeministrit.
