Rusia ka ndaluar furnizimin me naftë në Poloni.

Lajmin e kanë bërë të ditur mediat e huaja, sipas të cilave grupi polak i energjisë PKN Orlen thotë se Rusia ka ndaluar furnizimin e vendit me naftë, përmes tubacionit të saj Druzhba.

Ky grup bëri me dije gjithashtu se tubacioni në fjalë prek rreth 10% të nevojave të tij për naftë bruto, dhe sipas tyre, ajo mund të zëvendësohet nga burime të tjera.

“Ne po sigurojmë në mënyrë efektive furnizimet. Rusia ka ndërprerë furnizimet për Poloninë, për të cilën ne jemi të përgatitur”, tha shefi ekzekutiv Daniel Obajtek në Twitter.

PKN Orlen tha se ndalimi i furnizimit me naftë nga Rusia nuk do të ndikojë tek klientët e saj, pasi sipas tyre, grupi mund të mbushë rafineritë e tij përmes detit.

Kompania hyri në një kontratë me firmën ruse të naftës Tatneft në fillim të këtij muaji, pasi marrëveshja e saj me Rosneft, një kompani tjetër ruse, skadoi.

Tubacioni Druzhba, i cili gjithashtu dërgon naftë në disa vende të tjera, duke përfshirë Gjermaninë, Hungarinë, Republikën Çeke dhe Sllovakinë, është i përjashtuar nga sanksionet e rrepta të vendosura nga BE ndaj Rusisë.

Kjo për shkak se këto vende kanë më pak mundësi për marrjen e dërgesave të naftës nga burime të tjera.