Të paktën nëntë policë u vranë dhe 16 të tjerë u plagosën në një sulm vetëvrasës në autobusin me të cilin po udhëtonin sot në Pakistanin jugperëndimor. Kështu konfirmoi policia e këtij shteti. “Një person me bombë kishte hipur në një motoçikletë dhe u përplas në pjesën e pasme të autobusit,” tha Abdul Hai Amir, një zyrtar i policisë lokale.
Sulmi ndodhi në qytetin Dadar në rrethin Katchi, rreth 120 kilometra në juglindje të Quetta, kryeqyteti i provincës Baluchistan. Numri i të vdekurve mund të rritet pasi tetë të plagosur janë në gjendje kritike.
Ky është i fundit në një seri sulmesh kundër policëve në Pakistan. Asnjë organizatë nuk ka marrë ende përgjegjësinë.
Balochistani është një provincë e madhe, e varfër dhe pak e populluar e Pakistanit, në kufi me Afganistanin dhe Iranin. Provinca është e pasur me hidrokarbure dhe minerale, por banorët e saj, gati 12 milionë njerëz, ankohen se qeveria pakistaneze i ka margjinalizuar dhe po vjedh burimet natyrore të rajonit.
Për vite me radhë ka qenë skenë e konflikteve të dhunshme ndërmjet grupeve të ndryshme etnike dhe fetare. Në rajon, policia është shpesh shënjestër e sulmeve nga grupet kryengritëse lokale ose talebanët pakistanezë.
