Ende nuk ka asnjë gjurmë nga autori/ët e atentatit ndaj Aldi Mustafës një ditë më parë në Shkozet të Durrësit. Blutë e Durrësit po punojnë ende për zbardhjen e ngjarjes. Për këtë qëllim një grup pune po punon me kamerat e sigurisë të marra nga objektet rreth e rrotull vendit ku ndodhi shpërthimi.

Ndërkohë, gjatë ditës së djeshme dhe gjatë natës janë pyetur 8 persona në cilësinë e dëshmitarëve për të hedhur dritë mbi këtë ngjarje. Është konkluduar se shpërthimi është realizuar me telekomandim në distancë. Deri më tani nuk ka asnjë të ndaluar apo të shoqëruar.
Aldi Mustafa në dëshminë e dhënë ditën e djeshme ka deklaruar se nuk ka konflikte me njeri dhe nuk ka një ide se cili mund të jetë personi që i ka vënë lëndën plasëse në makinë. Në polici bëjnë të ditur se po hetojnë një pistë në vitin e largët 2001 kur ai ka kryer një plagosje në zonën e plazhit.