Partia e Lirisë ka paditur KQZ-në në lidhje me ndryshimin e vendimit të datës 2 maj, të KAS për anëtarin e katërt të grupeve të numërimit të votave, për zgjedhjet për organet e qeverisjes vendore të datës 14 Maj 2023.

Anëtarët e KAS me shumicë votash, lanë në fuqi vendimin e kryekomisionerit Celibashi që anëtari i katërt në KZAZ të ndahet mes PL-së dhe PDIU-së, të cilat do të kenë numërues vetëm në gjysmën e vendit.

Pra, është përcaktuar që nga 4 anëtarë, 2 numërues i përkasin PS-së dhe 1 PD-së. Sakaq, koalicioni “Bashkë Fitojmë”, do të ketë numërues vetëm në tavolinat me numër tek në të gjitha KZAZ-të e vendit. PDIU do të ketë numërues vetëm në tavolinat me numër çift.

NJOFTIM PËR MEDIA

Pranë Gjykatës Administrative të Apelit Tiranë, për llogari të Kolegjit Zgjedhor Gjyqësor, është paraqitur për shqyrtim çështja Nr.17 Regj. Themeltar, Datë 06.05.2023 Regjistrimi, me:

PADITËSE: Partia e Lirisë.

I PADITUR: Komisioni Qendror i Zgjedhjeve – (KQZ).

OBJEKTI: Ndryshimin e vendimit nr.71, datë 02.05.2023 të Komisionit të Ankimimeve dhe Sanksioneve (KAS) në Komisionin Qendror të Zgjedhjeve, duke vendosur:

Caktimin e Partia e Lirisë si parti politike që i lind e drejta e propozimit për anëtarin e katërt të grupeve të numërimit të votave, për zgjedhjet për organet e qeverisjes vendore të datës 14 Maj 2023.

Për dijeni, Komisioni i Ankimimeve dhe Sanksioneve (KAS), me Vendimin nr.71, datë 02.05.2023, objekt i kërkesëpadisë së mësipërme, ka vendosur:

“1. Rrëzimin e kërkesës ankimore nr. 53, datë 27.04.2023 të depozituar nga “Partia e Lirisë”, për shkak të mungesës së numrit të kërkuar të anëtarëve për vendimarrje.

Ky vendim hyn në fuqi menjeherë dhe publikohet në faqen zyrtare të Komisionit Qendror të Zgjedhjeve.
Kundër këtij vendimi mund të bëhet ankim në Kolegjin Zgjedhor të Gjykatës së Apelit Administrativ brenda 5 (pesë) ditëve nga shpallja e tij”.
Më datë 08.05.2023 u hodh shorti publik për përcaktimin e përbërjes së Kolegjit Zgjedhor Gjyqësor dhe, sipas tij, trupi gjykues përbëhet nga gjyqtarët:

Sokol Ibi (Relator);
Edlira Petri (Anëtare);
Alma Kolgjoka (Anëtare);
Manjola Xhaxho (Anëtare);
Blerona Hasa (Anëtare);
Me Urdhër datë 08.05.2023 “Për caktimin e seancës gjyqësore” të Kolegjit Zgjedhor Gjyqësor është caktuar data 09.05.2023, ora 13:30, për zhvillimin e seancës gjyqësore në:ambientet e godinës “Poli i Drejtësisë”, salla e konferencave të KLGJ-së, në adresën: Rruga “Ana Komnena”, Tiranë.

Tiranë, më 08.05.2023

Gjykata Administrative e Apelit Tiranë