Kur ka kaluar një orë nga nisja e procesit të votimit në të gjithë vendin, në disa bashki të ndryshme raportohen problematikat e para sa i takon identifikimit elektronik.

Gazetarët e Fax News që raportojnë nga të gjithë qytetet e vendit, raportojnë problematika duke nisur nga Shkodra, në Kamëz e Vorë.

Në Qarkun Shkodër raportohet se në rreth 80 qendra votimi ka probleme me pajisjen PEI të identifikimit elektronik.

Probleme me paisjen e identifikimit elektronik raportohen dhe në disa qendra votimi në Durrës, ku burime bëjnë me dije se ka nisur në mënyrë manuale me lista identifikimi i qyetarëve.

E njëjta problematikë është shfaqur dhe në Kavajë, ndërkohë që vonesa në nisjen e votimit ka pasur në disa qendra në qytetin e Vlorës.

Sa i takon Elbasanit, ku po ashtu do të votohet në mënyrë elektronike, në një qendër votimit në Lagjen Vullnetari, komisionerët nuk kanë pasur kodin e hapjes së materialeve zgjedhore, dhe për këtë shkak votimi ka nisur me vonesë.

Edhe në disa qendra të tjera ka probleme me ndezjen e pajisjeve.

Probleme me pajisjen PEI ka pasur dhe në Tiranë, ku në 2 prej 6 qendrave të votimit në shkollën “Dora d’istria” nuk ka nisur ende votimi.

Në QV 1980, nuk është paraqitur operatori i PEI, po në këtë qendër janë ngatërruar pajisjet PEI me një tjeter QV.

Edhe në Korçë, në 4 prej qendrave të votimit nuk ka nisur ende procesi për shkak se pajisja PEI nuk funksionon.

Edhe pse janë hedhur miliona euro për identifikimin elektronik të zgjedhësve, edhe në këtë 14 Maj, jemi ende larg një procesi model zgjedhor.