Biznesin që kishte marrë me qira, efektivi 24-vjeçar i policisë e kishte kthyer në një ambient për të shkelur ligjin. I ‘zhveshur’ nga uniforma, në rolin e biznesmenit, Redion Bello nga fshati Bajkaj i Delvinës, e kishte kthyer pazar droge, lokalin e tij ndërtuar mbi det në qytetin e Sarandës, “Secret Beach”.

Në fakt, sekretin e veprimtarisë së paligjshme brenda biznesit, e zbuluan kolegë të tij, Forcat Operacionale të Agjencisë së Mbikëqyrjes Policore, ndërhynë mbrëmjen e së dielës në lokalin e plazhit duke arrestuar në flagrancë punonjësin e policisë kufitare të Sarandës.

Operacionin e koduan “Last Sunday” (E diela e fundit) – si për të ironizuar fundjavën e fundit me drogë të policit Bello, tashmë në pranga.

Në këtë veprimtari, polici bashkëpunonte me një 23-vjeçar, Sejdi Vocka, i cili u arrestua bashkë me të, në ambientet e lokalit.

Policia sekuestroi rreth 100 doza kanabisi, një automjet, 555 euro, 20 paund dhe 20.000 lek.

Të dy do të hetohen nga prokuroria e Sarandës për veprat penale “Prodhim dhe shitje e narkotikëve e kryer në bashkëpunim” dhe “Mbajtje, prodhim pa leje e armëve dhe municionit”.

Sipas policisë, lokali i plazhit i ndërtuar me dru dhe me hapësirë mbi det edhe për shezlongje, ishte marrë thjesht për të kamufluar veprimtarinë -antiligjore të shpërndarjes së kanabisit.