Detaje të reja janë zbardhur nga ngjarja e ndodhur në Tiranë, ku një efektiv policie u dhunua së bashku me vëllain e tij.

Ngjarja ka ndodhur rreth orës 02:26 minuta në sheshpushimin e një pallati në rrugën “Besim Alla” në kryeqytet. Polici dhe vëllai i tij janë sulmuar dhe dhunuar me shkopa bejsbolli nga të paktën 7 persona, të cilët i kanë bërë pritë efektivit të policisë, i cili po lëvizte me automjet.

Efektivit i është bërë pritë dhe i kanë bllokuar rrugën në momentin që është futur në sheshpushimin e pallateve, pasi i kanë zënë rrugën me makina të tjera me targa angleze në hyrje. Në këtë moment, kanë filluar ta qëllojnë më shkopa bejsbolli drejt xhamave te makinës.

Polici tenton të largohet dhe të mbrohet dhe përpiqet të fusë automjetin drejt një garazhi të pallatit, por aty agresorët i kanë nxjerrë të dy nga makina dhe i kanë dhunuar. Efektivi dhe i afërmi i tij kanë tentuar vetëm të mbrohen nga agresorët. Edhe pse policia nuk e raportoi, ka pasur edhe të shtëna me armë zjarri, çka ka sjellë panik edhe nga banorët e lagjes të cilët kanë lajmëruar policinë, por kjo e fundit ka mbërritur në vendin e ngjarjes kur janë larguar autorët e sulmit.

Dy personat kanë marrë dëmtime të rënda pasi ndaj tyre është ushtruar dhunë barbare. Policia në deklaratë tha që në vendngjarje është gjetur edhe arma e shërbimit të efektvit.