Presidenti i Serbisë, Aleksandar Vuçiç, ka thënë se sot u bë një sulm brutal ndaj serbëve.

“Në vetëm një orë e njëzet minuta, disa dhjetëra serbë u rrethuan plotësisht, padyshim kjo u bë së bashku me forcat ndërkombëtare. Ndaj tyre u krye një sulm brutal dhe ne në fillim menduam se pse nuk e bëri KFOR-i, pasi do të kishte më pak viktima. Sipas informacioneve që disponojmë, thuhet se janë vrarë tre serbë nga Kosova. Dy me snajper, kur nuk ishte e nevojshme që të ‘likuidoheshin’.

Dy prej tyre janë plagosur rëndë, ndërsa ekziston frika se ka mbetur i vrarë edhe personi i katërt. Ne ndoqëm, përgjuam se çfarë po bënte policia shqiptare, do t’ju tregojmë provat, ndoshta edhe gjatë konferencës, presim vetëm përkthimin”, tha Vuçiç.

Presidenti tha se çështja është nëse një person do të mbijetojë vetëm sepse nuk donin ta ndihmonin dhe se “kemi regjistrime audio të policisë shqiptare duke qeshur dhe duke thënë ‘le të vdesë’”.

“Një grup serbësh nga Kosova dhe Metohija vendosën dy kamionë si barrikada në Banjskë në veri të Kosovës, pastaj arrin policia e Kosovës dhe tenton të heq barrikadat, pas së cilës ka një konflikt në të cilin vritet një polic shqiptar dhe një person është plagosur”, deklaroi Vuçiç në konferencën për media dhe shtoi se nuk e kanë adresuar më herët, sepse është dashur të kemi kohë për të shqyrtuar se çfarë ka ndodhur dhe për të marrë vendime që Serbia do t’i zbatojë.