Një ngjarje e rëndë ka ndodhur në Tiranë ku një fëmijë 3-vjeç, ka humbur jetën pas mjekimit te dentisti. Ngjarja ka ndodhur të dielën në një klinikë në “Rrugën e Kavajës”, ku i mituri i është nënshtruar një ndërhyrje në 4 dhëmballë. Mësohet se ndërhyrja ka zgjatur për disa orë, ndërsa më pas fëmija nuk është ndjerë mirë ku është dërguar në Urgjencë.

Burime bëjnë me dije se familjarët akzuojnë klinikën dentare për dozë narkoze të lartë, e cila i nxorri jashtë funksionit mëlçinë.

Sakaq familja e 3-vjeçarit ka denoncuar në polici mjekun Roland Xhaxho. I mituri ka humbur jetë pas ditësh, pas nderhyrjes ne dhemballe.

“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital”, thuhet në njoftimin e policisë.