GJKKO ka lënë në fuqi masën e arrestit me burg për shefin e policisë së Kurbinit, Dritan Metajn.

Dritan Metaj ka pranuar akuzat, ku thotë se me Gëzim Çelën ka njohje të vjetër. Tre shtetas janë shpallur në kërkim nga policia, në kuadër të operacionit “Flakë në det” mes tyre edhe Gëzim Çela i njohur si baroni i Fushë-Kuqes.

Të tre raportohen se janë jashtë Shqipërisë. Ata përbënin një grup të strukturuar kriminal në shitjen e lëndëve narkotike kryesisht kanabis. Dritan Metaj në cilësinë e shefit të Komisariatit e informonte grupin për lëvizjet e policisë.

Në një reagim pas operacionit nga ministri Balla, ai u shpreh se po vijon procesi i vetë-pastrimit të Policisë së Shtetit në mënyrë intensive.

Gjykata, në seancë gjyqësore të zhvilluar në prani të palëve në proces, pasi dëgjoi kërkimet dhe pretendimet e tyre, mori dhe vlerësoi aktet e depozituara prej tyre:

Gjykata, në bazë të neneve 228, 229, 230, 232, 238, 244, 246 e 248 të Kodit të Procedures Penale, kjo gjykatë, pasi formoi bindjen dhe në mbështetje të provave të shqyrtuara në këtë gjykim:

• Pranimin e kërkesës së Prokurorisë së Posaçme Kundër Korrupsionit dhe Krimit të Organizuar.
• Vazhdimin e masës së sigurimit personal me karakter shtrëngues “arrest në burg”, parashikuar nga neni 238 i K.Pr.Penale, e caktuar me vendimin nr. 110 datë 08.10.2023, të Gjykatës së Posaçme të Shkallës së Parë për Korrupsionin dhe Krimin e Organizuar, ndaj personit nën hetim Dritan Metaj si i dyshuar për kryerjen e veprave penale “Trafikimi i narkotikëve” e kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 283/a, 333/a dhe 334 të Kodit Penal.
• Urdhërohet Prokuroria e Posaçme Kundër Korrupsionit dhe Krimit të Organizuar për ekzekutimin e këtij vendimi.
• Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar, Tiranë, brënda afatit ligjor.