Policia greke ka ndërmarrë një aksion të suksesshëm duke arrestuar shtetasin shqiptar Marjan Lisi, 40 vjeç, i cili ishte shpallur në kërkim për akuzat e tentativës së vrasjes, grabitjes dhe mosbindjes në Greqi.

Marjan Lisi, bashkë me një shtetas tjetër shqiptar 41-vjeçar, i cili gjithashtu ishte shpallur në kërkim, dyshohet për kryerjen e një grabitje të armatosur në një stacion karburanti në zonën e Spata, Athinë, më 10 shtator të këtij viti. Ata gjithashtu janë akuzuar për tentativë vrasje, duke përdorur armë në një ngjarje të ndodhur në zonën Nea Makri, gjithashtu më 10 shtator, ku ata tentuan të grabisnin një person, pa i shkaktuar plagë.

Operacioni i policisë greke përfshiu forca të ndërhyrjes së shpejtë, dhe Marjan Lisi u arrestua në një vend të quajtur Vari në periferinë e Athinës. Në momentin e arrestimit, nuk ka pasur rezistencë nga ana e Marjan Lisit.

Policia ka konfirmuar se Marjan Lisi do të paraqitet para gjykatës për masat e sigurisë. Kjo ngjarje tregon bashkëpunimin e autoriteteve greke dhe shqiptare në kapjen dhe dërgimin para drejtësisë të personave të shpallur në kërkim për vepra kriminale.