Një operacion i gjerë është zhvilluar nga Agjencia e Mbikëqyrjes Policore në pikën doganore të Kakavijës në Gjirokastër, filluar nga mëngjesi i së Shtunës deri në orët e para të së Dielës. Pas hetimeve dhe me urdhër të Agjencisë, është arrestuar përgjegjësi i doganës dhe një doganier i kontrollit fizik, ndërsa një tjetër punonjës i doganës është shpallur në kërkim.

Agjencia e Mbikëqyrjes Policore kishte dyshime se punonjësit e doganës dhe efektivë policie ishin të përfshirë në skema korruptive në lidhje me procedurat e parregullta të zhdoganimit, duke përfituar shuma parash në mënyrë të paligjshme.

Gjatë operacionit janë evidentuar 1 trajler, 4 kamiona të tonazhit të rëndë, si dhe mjete të tjera të mbushura me mallra që kaluan pikën kufitare pa u nënshtruar kontrolleve dhe pa paguar taksat e zhdoganimit.

Hetimet po vazhdojnë për të zbuluar më shumë detaje dhe për të identifikuar nëse ka zyrtarë të tjerë të përfshirë në këtë skemë korrupsioni në pikën doganore të Kakavijës.