Një person, i afërmi i një të burgosuri në burgun e Vlorës, është arrestuar pasi ka tentuar të futë lëndë narkotike në brendësi të qelisë. Burime nga Shërbimi i Kontrollit të Brendshëm në Burgje njoftojnë se qytetari është kapur duke fshehur kokainën në brendësi të patateve, të cilat kishin për qëllim t’i dorëzoheshin personit të burgosur.

Lënda narkotike u zbulua gjatë një kontrolli me skaner të ushqimeve, ndërsa i afërmi i të burgosurit u prangos. Personi në fjalë është akuzuar për veprat penale “Prodhim dhe shitje narkotikësh” dhe “Futja dhe mbajtja e sendeve të ndaluara në institucionet e ekzekutimit të dënimit”.

Qytetari që dërgoi ushqimet në burg, F.C., u arrestua në flagrancë nga Shërbimi i Kontrollit të Burgjeve, ndërsa dosja në ngarkim të tij u referua në Prokurorinë e Vlorës. Ai akuzohet për prodhim dhe shitje narkotikësh si dhe për futje e mbajtje e sendeve të ndaluara në burg.