Një 41-vjeçare, nënë e katër fëmijëve, ka kryer vetëvrasje pasi u bullizua në rrjetin social “TikTok”.

Gruaja u gjet pa ndjenja në shtëpi nga bashkëshorti i saj mëngjesin e 2 janarit 2024, pasi kishte përdorur fotoksinë. Përkundër tentativave për ta shpëtuar në spitalet e Durrësit dhe Tiranës, ajo nuk mundi të mbijetojë.

Ngjarja ka filluar kur në rrjetin social “TikTok” u hap një llogari me identitet fals, ku u postua një foto denigruese e gruas, shoqëruar me fjalë të rënda. Gruaja dhe familja e saj kanë bërë kallëzim në polici, dhe kanë zbuluar se pas kësaj llogarie qëndronte një familjare e tyre, kushërira e viktimës.

Përderisa ata e kanë denoncuar këtë veprim në polici dhe kanë identifikuar fajtoren, bullizmi vazhdoi, ndikuar negativisht në gjendjen shpirtërore të 41-vjeçares. Gjatë kësaj periudhe të vështirë, ajo kishte shprehur disa herë dëshirën për të kryer vetëvrasje. Familja thotë se kushërira e viktimës kishte bërë veprime të ngjashme edhe me familje të tjera.

Kjo kishte bërë që gjendja e 41-vjeçares të rëndohej ditë pas dite. Madje, gjatë gjithë periudhës nga denoncimi deri në ngjarjen e pak ditëve më parë, 41 vjeçarja i kishte thënë herë pas here të birit se do të kryente vetëvrasjen.

“Sepse jam nuse në familjen … dhe për nder rroj”- ishte shprehur ajo, sipas dëshmisë së të birit 21-vjeçar.