Ish-ministrja e Drejtësisë dhe deputetja e Partisë Socialiste, Etilda Gjonaj, ka reaguar në lidhje me vetëvrasjen e një nëne 41-vjeçare në Durrës, e cila dyshohet se është dhunuar fizikisht dhe psikologjikisht, si dhe është denigruar në rrjetet sociale. Gjonaj ka bërë thirrje për një vëmendje më të madhe ndaj risqeve që sjell teknologjia dhe rrjetet sociale, duke kërkuar përfshirjen e dhunës psikologjike si një vepër penale e veçantë në Kodin Penal.
Në reagimin e saj, Gjonaj tha:
“Ngjarja e rëndë e ndodhur ndaj një gruaje dhe nëne të 4 fëmijëve në Durrës, është një këmbanë alarmi për të gjithë ne! Një dhunë psikologjike e ushtruar në mënyrë sistematike ndaj një gruaje, e cila për shkak edhe të kulturës dhe mentalitetit e gjeti veten nën presionin e sulmeve denigruese, duke shkaktuar pasoja fataliste për jetën e saj.”
Gjonaj theksoi nevojën për të ndryshuar Kodin Penal dhe për të përfshirë dhunën psikologjike si një vepër penale e veçantë. Ajo gjithashtu bëri thirrje për masat urgjente për të parandaluar dhe dënuar rastet e dhunës ndaj grave në të gjitha format e saj, duke përfshirë edhe dhunën psikologjike në rrjetet sociale.
Avokatja shprehu ngushëllimet e saj për familjen e viktimës dhe ftuar organet e drejtësisë të kryejnë hetimet e thelluara për të nxjerrë para përgjegjësisë autorët dhe institucionet shtetërore nëse nuk kanë marrë masat e duhura për të parandaluar ngjarjen tragjike.
