Pentagoni njoftoi se Shtetet e Bashkuara dhe Kina kanë mbyllur bisedimet e tyre ushtarake të mbajtura në Uashington. Ky angazhim është zhvillimi më i fundit pas rikthimit të komunikimeve midis dy vendeve, të ndërprera nga Kina kur kryetarja e Dhomës së Përfaqësuesve, Nancy Pelosi, vizitoi Tajvanin në gusht të vitit 2022. Bisedimet u rikthyen pas marrëveshjes midis Presidentit Biden dhe homologut kinez Xi Jinping për rimarrjen e dialogut ushtarak. Bisedimet përqendruan rreth marrëdhënieve në fushën e mbrojtjes, dhe zëvendës ndihmës sekretari i mbrojtjes për Kinën, Tajvanin dhe Mongolinë, Michael Chase, theksoi rëndësinë e mbajtjes së hapur të rrugëve të komunikimit për të parandaluar tjetërsimin e rivalitetit në konflikt.
Shefi i Shtabit të Shtatmadhorisë amerikane, Gjenerali Charles Q. Brown, zhvilloi muajin e kaluar një bisedë virtuale me homologun e tij kinez, Gjeneralin Liu Zhenli.

Zyrtarët e Pentagonit thonë se komunikimi midis dy ushtrive është thelbësor për të parandaluar një kalkulim të gabuar që të tjetërsohet në konflikt.
Zyrtarët amerikanë kanë paralajmëruar se edhe pas rivendosjes së disa komunikimeve ushtarake, do të duhet kohë për krijimin e një dialogu funksional mes dy palëve.
Uashingtoni dhe Pekini kanë mosmarrëveshje për shumë çështje, që nga e ardhmja e Tajvanit të vetëqeverisur në mënyrë demokratike e deri tek pretendimet territoriale në Detin e Kinës Jugore.
Marrëdhëniet diplomatike janë ende duke u përmirësuar pasi SHBA-të rrëzuan shkurtin e kaluar një balonë kineze të dyshuar për spiunazh.
Këtë fundjavë, Tajvani do të zhvillojë zgjedhje presidenciale dhe parlamentare mes tensioneve me Kinën, e cila ka pretendime territoriale ndaj ishullit pavarësisht kundërshtimeve të forta nga qeveria tajvaneze