Ministrja e Turizmit dhe Mjedisit, Mirela Kumbaro, ka njoftuar sot miratimin e një ligji të ri për turizmin gjatë mbledhjes së Këshillit të Ministrave. Në prezantimin e vendimit, Kumbaro theksoi se ligji aktual i vitit 2015 nuk ka pasqyruar realitetin dhe dinamikat e reja të sektorit turistik në vitin e kaluar.

Ministrja Kumbaro tha: “Sot miratuam në mbledhjen e parë të qeverisë për këtë vit, ndryshime për një ligj të rëndësishëm. Turizmi ka qenë e do jetë kryefjalë, ligji i 2015 nuk i përgjigjej realitetit dhe dinamikave të reja. Edhe vizioni i qeverisë është shumë më i avancuar se ligji i 2015. Kjo bënte të nevojshme nevojën për ndryshime ligjore, qoftë për realitetet e reja në tregun e turizmit, kërkesat e konsumatorit, për të dhënë garanci më shumë për shërbime më cilësore.”

Ajo vuri në dukje se ligji i ri synon të sigurojë një konkurrencë të ndershme dhe një raport të drejtë me tatimet në shtet. Në anën tjetër, theksoi rëndësinë e pasqyrimit të praktikave reale në sektorin e turizmit në ligjin e ri. Ligji përfshin edhe nxitje për zhvillim të qëndrueshëm dhe një rëndësi më të madhe për statistikat në fushën e turizmit.

Ministrja e Turizmit po ashtu informoi se ky draft ligji është pasqyruar në disa tryeza diskutimesh dhe po përputhet me dy nisma të tjera, duke përfshirë strategjinë kombëtare të turizmit për periudhën 2024-2030, e cila pritet të finalizohet brenda pranverës së këtij viti.