Pak orë para fillimit të sesionit të ri parlamentar, ambasadori gjerman në Tiranë, Karl Bergner, ka bërë thirrje ndaj deputetëve për të zhvilluar debate konstruktive, duke theksuar se kjo është pritshmëria e qytetarëve nga Parlamenti.

Ambasadori Bergner ka shprehur respektin e tij për rolin e parlamentit si një institucion të rëndësishëm në ruajtjen e demokracisë, ku deputetët paraqesin propozimet e tyre lidhur me të ardhmen integruese të vendit.

Në një postim në Facebook, ai theksoi:

“Sot Kuvendi do të mbajë seancën e parë të këtij viti. Kam respekt të madh për rolin e parlamentit si një institucion i domosdoshëm në një demokraci dhe gjithashtu për ata deputetë që punojnë fort për të fituar shumicën për propozimet e tyre në komisione dhe në seancë plenare në Kuvend. Me të drejtë qytetarët presin që Parlamenti të jetë një forum ku diskutohen ide të ndryshme politike në mënyrë konstruktive dhe me respekt. Unë besoj se Parlamenti i qëndron kësaj përgjegjësie.”

Ky mesazh vjen në një kontekst ku mazhoranca ka kërkuar përfshirjen e opozitës në procesin e miratimit të ligjeve të rëndësishme për integrimin dhe zhvillimin e vendit, ndërsa disa deputetë opozitarë kanë shpërndarë qëndrimin se do të vijojnë me aktet e dhunës dhe mosbindjet civile në Kuvend.