Autoritetet italiane kanë nisur hetimet në lidhje me ngjarjen tragjike të vdekjes së Anna Bellisario, një 20-vjeçareje që humbi jetën pasi konsumoi një ëmbëlsirë ‘tiramisu’ në një restorant të Milano më 26 janar të vitit të shkuar.

Anna, e cila kishte alergji nga bulmetet, kishte porositur një ëmbëlsirë të reklamuar si vegane, pa përmbajtje bulmeti ose mishi. Megjithatë, pak kohë pas konsumimit të ëmbëlsirës, ajo përjetoi një krizë anafilaktike dhe vdiq një javë më vonë në spitalin San Raffaele.

Hetimet aktualisht përqendrohen në dy gratë drejtuese të dyqanit të ëmbëlsirave, të cilat akuzohen për vrasje nga pakujdesia. Burime zyrtare sugjerojnë se ato mund të kenë përzier etiketat e produkteve vegane me ato që përmbanin qumësht, duke sjellë rrezik për konsumatorët me alergji.

Prokurorët Tiziana Siciliano e Luca Gaglio kanë dalë me deklaratën se drejtueset e dyqanit nuk bënin ndarje të plotë të produkteve dhe furnizonin restorante të tjera me produktin “tiramisu vegane”. Në ndërkohë, është bërë të ditur se autoritetet kanë tërhequr produktin Tiramisu Mascherpa nga tregu pas dyshimeve të shfaqura gjatë hetimit. Familjarët e viktimës kërkojnë drejtësi dhe transparencë në këtë çështje të ndërlikuar.