Ministri i Jashtëm shqiptar, Igli Hasani, ka shprehur nevojën që rajoni i Ballkanit të ketë një zë më të fuqishëm dhe një orientim të qartë euro-atlantik. Ai ka bërë këtë deklaratë gjatë një vizite zyrtare në Malin e Zi, duke theksuar se aktorë si Rusia po tentojnë të destabilizojnë rajonin përmes akteve të ndryshme.

Ministri Hasani ka theksuar se faktori shqiptar në rajon është orientuar drejt parimeve demokratike dhe vlerave evropiane, duke e vlerësuar si një element përbashkues të shoqërisë. Ai ka shtuar se Shqipëria dënon vendet si Rusia që tentojnë të shkaktojnë destabilizim në rajon.

Gjatë takimit me homologun malazez Filip Ivanoviq, Hasani ka theksuar rolin e partneritetit dhe fqinjësisë së mirë mes dy vendeve. Ai ka pohuar se Mali i Zi është një partner me rëndësi për Shqipërinë, veçanërisht në rrugën drejt integrimit euro-atlantik dhe ka shtuar se dialogu politik ka ardhur duke u rritur.

Ministri Hasani gjithashtu ka vënë theksin në zbatimin e marrëveshjeve të firmosura mes dy vendeve, duke theksuar rëndësinë e ndërtimit të projekteve të përbashkëta që do kontribuojnë në rritjen e bashkëpunimit dhe zhvillimit ekonomik rajonal. Ai ka përmendur ndërtimin e urës mbi lumin Buna dhe ndërtimin e Autostradës Adriatiko-Joniane si prioritetet strategjike të Shqipërisë. Ministri tha se Shqipëria është gati për Konferencën e dytë Ndërqeveritare.

Të avancojmë bashkëpunimin dhe projekte e shumta mes nesh. Mali i Zi është për Shqipërinë një partner me një rëndësi të veçantë ku modeli është ai i fqinjësisë së mirë dhe Shqipëria e konsideron një aleat të pazëvendësueshëm në NATO dhe rrugën drejt integrimit europian dhe marrëdhëniet tona kanë shënuar një progres të madh. Dialogu politik ka ardhur duke u shtuar,” tha Hasani.

“Zbatimi i marrëveshjeve të firmosura mes dy qeverive së bëra së fundit janë të rëndësishme. Një nga projektet më të rëndësishme është ndërtimi urës mbi lumin Buna që do nxis zhvillimin e dy vendeve dhe do i shërbejë më mirë qarkullimit rajonal të mallrave. Edhe ndërtimi i Autostradës Adriatiko-Joniane është një nga prioritetet tona strategjike. Shqipëria tashmë është gati për Konferencën e dytë Ndërqeveritare,” u shpreh ministri Hasani.

Vizita e ministrit Hasani në Malin e Zi është pjesë e një turi në rajonin e Ballkanit, duke filluar me Kosovën dhe Maqedoninë e Veriut, ku ka vlerësuar shqiptarët si faktor stabiliteti.