Ngjarja e rëndë e vetëvrasjes së nënkomisarit të Policisë Arben Pjeçi në ambientet e Komisariatit të Policisë Durrës është konfirmuar nga një njoftim zyrtar i Policisë. Sipas njoftimit, familia e oficerit ka njoftuar policinë për humbjen e kontakteve me të, dhe pas kësaj, është gjetur në ambientet e zyrës së tij, i vetëvrarë me armën e shërbimit.
Nënkomisari Arben Pjeçi ishte dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, për kundravajtjen penale “Plagosje e lehtë”. Vendimi i dënimit po ekzekutohej nga strukturat përgjegjëse të Shërbimit të Provës dhe Policisë së Shtetit.
Në informacionet e para, theksohet se Pjeçi ishte në një gjendje depresioni për shkak të dënimit të marrë dhe pezullimit nga puna. Ngjarja ka shokuar opinionin dhe po hetohet nga autoritetet për të gjetur më shumë detaje rreth kësaj ngjarjeje të trishtueshme.
Njoftimi i policisë:
Rrreth orës 16:15, në ambientet e Komisariatit të Policisë Durrës është hapur me forcë zyra e oficerit Policisë Gjyqësore, Arben Pjeçi, i cili është gjetur i vetëvrarë, me armën e shërbimit.
Pjeçi është dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, për kundravajtjen penale “Plagosje e lehtë”, në bazë të nenit 89 të Kodit Penal. Vendimi i Gjykatës i formës së prerë ka filluar të ekzekutohet nga strukturat përgjegjëse të Shërbimit të Provës dhe Policisë së Shtetit.
Pjeçi, në kushtet e depresionit për penalitetet që sjell vendimi i dënimit të formës së prerë që e kushtëzonte në të ardhmen me ndërprerjen e marrëdhënies së punës me Policinë e Shtetit, është vetëvrarë me armën e shërbimit në ambientet e zyrës së punës, në Komisariatin e Policisë Durrës.
“Ndodhem në ambientet e jashtme të Policisë së qarkut të Durrësit. Nënkomisari i policisë i ka dhënë fund jetës duke u vetëvrarë. Ishin familjarët që kishin humbur kontaktet gjatë ditës së sotme. Policia e ka gjetur pa shenja jete nënkomisarin e qarkut të Durrësit. Mësohet se nënkomisari ishte i stresuar gjatë ditëve të fudiut, ishte pezulluar për disa ditë nga puna. Policia e Durrësit po punon duke mbledhur prova dhe fakte të tjera. Është ngritur një grup pune për ta hetuar këtë çështje,. Është një ngjarje e rëndë. Policia në deklaratën e saj thotë se jemi lajmëruar nga familjarët dhe më pas ne e kemi shqyer derën dhe e kemi gjetur të pajetë. Pistoleta bën zhurmë dhe nuk ishte e nevojshme të kishte një lajmërim nga familjarët”, raportoi gazetari Leonidha Musaj.
