Eksperti i Sigurisë, Fation Softa, ka ngritur dyshime të forta në lidhje me ngjarjen e rëndë të vetëvrasjes së nënkomisarit Arben Pjeçi në Durrës. Në një intervistë, ai shpreh mospërputhje në detajet e ngjarjes, duke vënë theksin në faktin se nuk u dëgjua zhurma e armës dhe se familjarët nuk arritën të marrin kontakt me viktimën. Softa insiston që një hetim thellësues duhet të kryhet nga grupi hetimor dhe Agjencia e Policisë për të sqaruar çdo dyshim.

Në një pjesë të diskutimit në studio, Softa shtoi:

“Ai hyn dhe del në komisariat. Ka edhe kontakt me të tjerë. Të gjitha zyrat me rregullore çelësin duhet ta ketë nga jashtë. Si ka mundësi që familjarët nuk e gjenin dot ku ishte? Po arma që vrau veten nuk është dëgjuar? Pse duhet të mendonte ai për të minimizuar zhurmën, kur do vriste veten? Kjo i takon grupit hetimor dhe AMP. Po të flasim për këtë, i bie që ai ka qenë në gjendje normale pastaj.”

Në pjesën tjetër të diskutimit, një person me emrin Demi thekson:

“Teorikisht personat që kanë marrë vendimin për të vrarë veten dhe kanë planifikuar gjithçka, mund të kalojnë në një gjendje të dukshme qetësie pasi kanë marrë vendimin. Por kjo nuk vjen nga hiçi. Përpara se të ketë marrë këtë vendim, personi duhet të ketë shfaqur shenja të dukshme, të rënduar të shëndetit mendor.”