Ish-zv. kryeministri dhe ministri i Financave, Arben Ahmetaj, ka humbur statusin e pasaportës diplomatike sot, një privilegj që e kishte fituar si deputet i Parlamentit. Ministria e Jashtme ka bërë të ditur se kjo veprim është pjesë e procedurave pas ndërprerjes së mandatit dhe shpalljes së pavlefshme të pasaportës diplomatike sipas legjislacionit. Ahmetaj ka larguar vendin muaj më parë, ndërsa ishte pjesë e hetimeve lidhur me çështjen e inceneratorëve. Veprimi vjen pas vendimit të Kuvendit për të hequr imunitetin parlamentar.

Njoftimi i Ministrisë së Jashtme:

“Procedura për shpalljen e pavlefshme të një pasaporte diplomatike është bërë në bazë të ligjit, një anëtar i Kuvendit të Shqipërisë humbet të drejtën e pasaportës diplomatike me vendim të Kuvendit, për ndërprerjen/humbjen e mandatit të deputetit.

Sipas ligjit, pasi Kuvendi i përcjell shkresën zyrtare se individi nuk gëzon më mandatin e deputetit, MEPJ nis procedurën administrative, e cila bazohet në VKM 389, datë 12.06.2019, “Për kriteret për lëshimin e pasaportës diplomatike dhe asaj të shërbimit” pikat 3,4,6,7 dhe Ligji nr. 8668, datë 23.10.2000, i ndryshuar “Për pajisjen e shtetasve shqiptarë me pasaportë për jashtë shtetit”, neni 8 dhe neni 9. Bazuar në sa më lart, MEPJ sipas procedurës standarde përcjell njoftimin për shpalljen e pavlefshme të pasaportës në të gjitha përfaqësitë e Republikës së Shqipërisë”.