Gjykata e Elbasanit ka dhënë masën e sigurisë ‘arrest në burg’ për Arbër Paplekajn, i dyshuar për kryerjen e veprave penale “Vrasja në rrethana të tjera cilësuese kundër dy ose më shumë personave dhe në mënyrë të rrezikshme për jetën e shumë personave”, “Vrasja e punonjësve të Policisë së Shtetit, e mbetur në tentativë”, “Heqja e paligjshme e lirisë e kryer me dhunë” në bashkëpunim.
Gjykata ka caktuar masën ‘detyrim paraqitje’ për Eldjo Bekon, i cili akuzohet për veprën penale “Veprime që pengojnë zbulimin e të vërtetës”.
Po ashtu ‘detyrim paraqitje’ caktoi gjykata edhe për 9 të ndaluarit e tjerë, Arjan Hoxha, Pavlo Vuksani, Emiljan Prenga, Juljan Mataj, Erald Guga, Erjon Demushi, Taulant Ymeri, Roland Xhepa, Nuredin Kasma, të dyshuar për kryerjen e veprës penale “Heqja e paligjshme e lirisë së personit e kryer me dhunë”në bashkëpunim.
Të gjithë këta shtetas akuzohen si të përfshirë në vrasjen që ndodhi në 21 prill në lagjen ‘5 maji’ në Elbasan, ku mbeti i vdekur Pjerin Xhuvani dhe u plagosën katër persona të tjerë.
