Presidenti i Serbisë, Aleksandar Vuçiç, ka pranuar gjatë një interviste të mbajtur mbrëmjen e djeshme se para sulmit terrorist në veri të Kosovës, ai ka takuar tre net rresht me Milan Radoiçiçin. Radoiçiç është personi kryesor që ka pranuar se ka organizuar sulmin e 24 shtatorit, ku u vra një polic, Afrim Bunjaku.

Gjatë intervistës në TV Happy, Vuçiç tha se në takim ishin pranë Radoiçiçit edhe Slavko Simiç dhe disa persona të tjerë.

“Unë tri net kam pasur takim me ata, aty ishin Radoiçiç e Simiç edhe nja dhjetë burra tjerë. Më thanë në fytyrë se nuk ju besojnë as amerikanëve as evropianëve, ndërsa unë ju thashë se më duhet të ju besoj se nuk kam kujt tjetër sepse nuk kam askënd në terren. Ata (amerikanët e evropianët) garantuan se shqiptarët nuk do arrestojnë askënd nga barrikadat. Pas tre muajve nisën arrestimet, mund të kuptoni telashet,” tha Vuçiç.

Më 24 shtator, Policia e Kosovës u sulmua në Banjskë të Zveçanit, ku u vra polic Afrim Bunjaku dhe u plagos një tjetër. Në kundërsulm, Policia e Kosovës vrau tre terroristë dhe arrestoi disa tjerë. Përgjegjësinë për sulmin e ka marrë Milan Radoiçiç, që në atë kohë ishte nënkryetar i Listës Serbe dhe person i afërt me presidentin e Serbisë, Aleksandar Vuçiç.