Pas kapjes së një ngarkese me 500 kg kokainë në Zvicër, identifikohet njëri prej të dyshuarve shqiptarë. Mario Marashi, 33 vjeç, banues në Itali prej 10 vitesh, është një ndër tre personat e arrestuar dhe është ekstraduar në Zvicër.

Ngjarja ka ndodhur më 2 maj 2022, kur një punonjës i fabrikës “Nespresso” në Romont, Zvicër, zbuloi 500 kg kokainë në një kontenier. Hetimet tregojnë se droga nuk ishte e destinuar për përdorim në prodhimin e kapsulave të kafesë dhe prodhuesi nuk ishte i përfshirë në trafik.

Detajet e reja zbuluan se kontejneri kalonte përmes kantonit të Friburgut në Zvicër. Një vit më parë, në të njëjtën zonë, ishin gjetur 400 kg kokainë. Dy ditë para zbulimit të drogës, një shqiptar u kap në atë zonë, ndërsa një tjetër arriti të largohet. Analizat e videos treguan se ata kishin tentuar të gjenin një kontenier të caktuar.

Hetuesit lidhën ngjarjen me zbulimin e kokainës në vitin 2021 dhe identifikuan të dyshuarit. Të paktën dy prej tyre janë shqiptarë me banim në Lombardi. Mario Marashi është arrestuar dhe ekstraduar në Zvicër për të përgjigjur për rolin e tij në këtë operacion të trafikut të drogës.