Policia e qytetit të Shkodrës ka dalë me një komunikatë zyrtare në lidhje me atentatin e regjistruar pasditen e kësaj të enjte në kryeqendrën e veriut, ku shënjestër ishte Selami Brahimi. Automjeti i tij, një “Citroen”, u qëllua me armë zjarri nga pjesa e pasme, ndërsa Brahimi mbeti i plagosur dhe u transportua në spital për ndihmë mjekësore. Autoritetet po hetojnë ngjarjen dhe po këqyrin kamerat e sigurisë për identifikimin e autorëve të ende të paidentifikuar. Motivi i atentatit ndaj Brahimit mbetet i paqartë, pasi ai nuk rezulton të ketë probleme ligjore. Forcat e policisë dhe grupi hetimor janë në vendngjarje për të kryer veprimet për sqarimin e rrethanave të ngjarjes.

Rreth orës 17:55, në lagjen “ 10 Korriku”, Shkodër, është qëlluar me armë zjarri makina e shtetasit S. B.,(e cila ka qenë e ndaluar). Si pasojë është plagosur jashtë rrezikut për jetën pronari i mjetit shtetasi S. B. Menjëherë në vendngjarje kanë shkuar forcat e Policisë dhe grupi hetimor, për të kryer veprimet për sqarimin e rrethanave të ngjarjes. Po këqyren kamerat e po vijon kontrolli i zonës nga shërbimet e Policisë për të bërë të mundur identifikimin dhe kapjen e autorit/ve”-njofton policia.