Banka Evropiane e Investimeve (BEI) ka nënshkruar një kredi investimi prej 33 milionë eurosh për ndërtimin e centralit më të madh fotovoltaik diellor në Kosovë, me kapacitet deri në 100 MWac (120 MWp) në afërsi të Prishtinës.
Ky investim do të ndihmojë në rritjen e përqindjes së energjisë diellore në prodhimin e energjisë dhe do të kontribuojë në sigurinë e furnizimit me energji elektrike, tranzicionin më të shpejtë të gjelbër dhe rritjen ekonomike në rajon.
Pas përfundimit të projektit, centrali pritet të prodhojë rreth 169 GWh energji elektrike në vit dhe të shmangë mesatarisht 174,000 tonë CO2 në vit.
Investimi vjen në kuadër të mbështetjes së Team Europe, e cila përfshin një grant prej 32 milionë eurosh nga BE për përgatitjen dhe zbatimin e projektit, duke kombinuar me kredi nga BEI dhe KfW.
Zëvendëspresidenti i BEI-t për aktivitetet në Ballkanin Perëndimor, Kyriacos Kakouris, tha se ky projekt është një hap i rëndësishëm drejt sigurisë energjetike dhe energjisë së rinovueshme për Kosovën.
Ndërkaq, Ministri i Financave, Punës dhe Transfereve i Kosovës, Hekuran Murati, e cilësoi nënshkrimin e marrëveshjes si një moment historik për vendin, duke theksuar angazhimin për përdorimin e energjisë së rinovueshme.
Shefja e seksionit politik në zyrën e BE-së në Kosovë, AnnaCarin Platon, u shpreh se ky investim është një angazhim për një të ardhme të qëndrueshme dhe një hap i rëndësishëm drejt energjisë së gjelbër dhe rritjes ekonomike në rajon.
