Kreu i Partisë së Demokratëve në Greqi, Andreas Lloverdhos, bashkë me Kreun e PBDNj – së Vangjel Dule, vizituan burgun e Fierit për të takuar kryetarin e zgjedhur të bashkisë së Himarës, Fredi Beleri, i cili po vuan dënimin e tij prej 5 marsit 2024.

Pas daljes nga ambientet e paraburgimit të Fierit, Lloverdhos, ish-ministri i Arsimit, Shëndetësisë, dhe ish-zv.ministër i Jashtëm i Greqisë, u shpreh për mediat duke nënvizuar mungesën e sundimit të ligjit në Shqipëri.

“Si një profesionist i ligjit dhe avokat, si dhe politikan, do të theksoja se në këtë vend në Shqipëri, sundimi i ligjit është inekzistent. Lidhur me çështjen e Belerit, nën këto kushte institucionale negative, Shqipëria nuk ka shanse t’i bashkohet Bashkimit Europian.”

Fredi Beleri u shpall fajtor për akuzën e korrupsionit aktiv në zgjedhje dhe u dënoi me 2 vjet burg nga trupi gjykues i GJKKO-së më 5 mars 2024, duke u përballur me shtyrje të seancës sot. Avokatët e tij e kanë çuar çështjen në gjykatë Kushtetuese pasi Beleri kërkon të betohet si kryetar bashkie i Himarës, gjë që është refuzuar nga gjykatat e tjera.