Komisioneri për Zgjerim në Bashkimin Evropian, Oliver Varheyli, jep lajmin se javën e ardhshme do të mbërrijnë në Ballkanin perëndimor 651 mijë vaksina të Pfizer.

Përmes një mesazhi në “Twitter”, komisioneri Varheyli thekson se javën që vjen do të udhëtojë edhe vetë në Ballkanin Perëndimor, për të sjellë dozat e vaksinave të kompanisë Pfier-BioNTech.

“Unë do të udhëtoj në Ballkanin Perëndimor javën e ardhshme, pasi vaksinat e para kundër Covid-19 të financuara nga BE arrijnë në rajon. 651 000 doza të vaksinës Pfizer-BioNTech do të dorëzohen në muajin maj deri në gusht për të rritur fushatën e vaksinimit. Ne kujdesemi!”, shkruan komisioneri Varhelyi.

Nga kjo dërgesë e BE, 145.000 doza vaksine do të sillen në Shqipëri. Ambasadori i BE në Tiranë, Luigi Soreca, njofton se komisioneri Varhelyi do të jetë në Shqipëri për të sjellë vaksinat ditën e mërkurë, më 5 maj.

“Komisioneri Oliver Varhelyi 🇪🇺 do të jetë në Tiranë të mërkurën më 5 maj ndërsa do të mbërrijnë dozat e para të vaksinave anti #COVID19 të financuara nga #BE. Kjo dërgesë konfirmon angazhimin e vazhdueshëm për të ofruar mbështetje, siç kemi bërë që nga shpërthimi i pandemisë”, shkruan ambasadori Soreca.