Shërbimi sekret çek ka zbuluar një rrjet propagande të financuar nga Rusia, me qëllim dobësimin e Ukrainës. Hetimet e shërbimit sekret çek kanë zbuluar se portali i lajmeve “Zëri i Evropës” me qendër në Pragë ka qenë baza e aktiviteteve të këtij rrjeti për përhapjen e propagandës.

Synimi i tyre ishte që të ndikojnë në ndalimin e ndihmës për Ukrainën nga Bashkimi Evropian në luftën kundër Rusisë.

E përditshmja çeke “Denik N” ka njoftuar se ky portal ka publikuar deklarata të politikanëve nga vende të ndryshme të Evropës, të paguar nga Rusia, që kërkonin ndalimin e ndihmës ndaj Ukrainës.

Pagesat për politikanët evropianë janë bërë në dorë gjatë takimeve personale në Pragë ose në formë kriptomonedhe, në shuma të konsiderueshme.

Kryeministri çek Petr Fiala ka identifikuar oligarkun prorus Viktor Medvedcuk si personin pas faqes “Zëri i Evropës”, një aleat i besuar i presidentit rus Vladimir Putin, i cili ka udhëhequr përpjekjet për destabilizim në Ukrainë.