Franca ka kërkuar ndihmën e 46 vendeve për të siguruar më shumë se 2,000 oficerë policorë për ruajtjen e sigurisë gjatë Lojërave Olimpike të verës në Paris.

Organizatorët po përfundojnë planet e sigurisë për Olimpiadën e parë në kryeqytetin francez pas një shekulli, duke pasur parasysh shqetësimet për sulmet e mundshme.

Ministria e Brendshme e Francës tha të premten se kërkesa për ndihmë të sigurisë nga jashtë u bë në janar.

Ajo ka kërkuar rreth 2,185 oficerë për të ndihmuar në sigurinë gjatë Lojërave dhe për të përforcuar bashkëpunimin ndërkombëtar. Franca i ka dërguar 200 xhandarë në Katar për Kupën e Botës në futboll më 2022 dhe ka pritur 160 oficerë nga forcat evropiane të sigurisë për Kupën e Botës në ragbi vitin e kaluar.

Ministria e Mbrojtjes e Francës ka kërkuar nga vendet e huaja një numër të vogël ushtarësh për të ndihmuar me detyra të veçanta gjatë Lojërave, ndërsa Ministri i Mbrojtjes i Polonisë ka deklaruar se vendi i tij do të dërgojë ushtarë në Olimpiadën e Parisit.

Siguria është një sfidë e madhe për autoritetet franceze gjatë kësaj Olimpiade, duke pasur parasysh që Parisi është goditur vazhdimisht nga sulme ekstremiste dhe pritet të ketë më shumë se 15 milionë vizitorë nga 26 korriku deri më 11 gusht.

Qeveria e Francës ka ngritur nivelin e sigurisë pas sulmit në një sallë koncertesh në Rusi, për të cilin u mor përgjegjësia nga Shteti Islamik.