Një incident i rëndë ka trazuar autoritetet holandeze sot, ku një person i armatosur dhe me eksploziv ka hyrë në një lokal dhe mban peng klientët që ndodhen aty. Tre nga pengjet u liruan rreth mesditës, megjithëse mediat lokale raportojnë se incidenti ende nuk ka përfunduar.

Policia ka kryer evakuimin e 150 shtëpive në zonë dhe i ka kërkuar qytetarëve të mos afrohen. Njësitë speciale të policisë janë vendosur rreth ndërtesës së kafenesë Petticoat, e cila ndodhet në qendër të qytetit.

Policia lokale nuk ka informacione që tregojnë se ky është një incident terrorist.

“Ne shohim se ka shumë pyetje rreth motivimit. Për momentin nuk ka asgjë që të tregojë se ky është një akt terrorist,” tha policia në një deklaratë të publikuar në platformën e rrjeteve sociale.