Në takimin me demokratë në qytetin e Beratit, deputeti i Rithemelimit, Agron Gjekmarkaj, bëri theksin se Shqipëria është në rrugën e shkretimit për shkak të vidhjes së parave publike dhe koncentrimit të pushtetit tek një person. Në fjalën e tij, Gjekmarkaj shtoi se Partia Demokratike mund të ndalojë këtë shkretim dhe transformimin e demokracisë në autokraci, ndërsa konsideron se kambanat e alarmit janë rënë.
Fjalimi i plotë i Agron Gjekmarkaj është si vijon:
“Bashkëbisedimi me ju është një kënaqësi dhe një shpresë më shumë në momentet ku gjithsecili duhet të marrë vendime të mëdha për veten, familjen, qytetin dhe vendin. Nuk na lejohet të rrimë pasivë përballë zhvillimeve politike në vend! Indiferenca nuk është alet, por armiku i çdo aspirate. Shqipëria nuk qeveriset, por sundohet! Shqipëria prej 12 vitesh nuk administrohet, por korruptohet dhe vidhet! Nga 12 vjetët e fundit, populli zvogëlohet ndërsa kasta e ushqyer me paratë publike rritet.
Monizmi dhe pushteti absolut, nëse ne nuk reagojmë, nuk është më iluzion, por realitet. Pushtetet janë përqendruar në mënyrë piramidale vetëm te një njeri dhe cka mbetet tek shërbëtorët e tij! Shikoni cfarë ndodh me paratë publike, skandalet me inceneratoret, vjedhjet masive, sterilizimin, 200 milion euro ndërsa pensionet dhe rrogat mbeten mizerabile.
Shikoni sagën e drejtorëve që e kanë kthyer shtetin në bahçen e tyre të veseve. Çfarë bëjnë ata, paratë e investimeve publike i marrin toptan, sade, dhe bëjnë hotele, makina luksi, llogari bankare! Ata e duan pushtetin vetëm për këtë. Na thonë na votoni që t’ju vjedhim.
PD ka përjetuar periudha të vështira por epoka. Sot është më e fortë, më e bashkuar dhe më e vendosur për ndryshim. Ka dalë nga rrethimi dhe është në sulm në emër të shqiptarëve dhe për ta!
Në vitin 1990, PD u shfaq me projektin e lirisë dhe themelimit, të pluralizmit, Shqipërinë si gjithë Europa! Në vitin 1992, me shndërrimin e lirisë në demokraci, në shtet të së drejtës, transformimin e ekonomisë socialiste në ekonomi tregu, hapin e parë drejt institucioneve evropiane!
Në vitin 2005, u rikthye me duar të pastra, ristabilizoi shtetin, shkatërroi bandat, ndërtoi infrastrukturën moderne, realizoi arritjet historike duke futur Shqipërinë në NATO, lëvizjen e lirë pa viza, vizitën e Presidentit Bush, marrëveshjen e Asociimit dhe Stabilizimit me BE, rritjen e rrogave për shumë kategori!
Po i kujtoj këto për të thënë demokratëve dhe qytetarëve se të qenit me Partinë Demokratike është krenari dhe përgjegjësi, sepse ajo gjithmonë ka një projekt në dobi të Shqipërisë dhe qytetarëve të saj!
PD ka politikanë, ka profesionistë, ka elita, ka njerëz të ndershëm që mund të kthejnë vendin në shtigjet e normalitetit, mund t’i hiqej hajdutët nga qeveria dhe administrata, mund të kthejnë shqiptarët të jetojnë me dinjitet në shtëpitë e tyre!
PD mund ta ndalojë shkretimin e Shqipërisë dhe transformimin e demokracisë në autokraci. Kambana e alarmit ka rënë! Lideri i opozitës, themeluesi i pluralizmit pa akuza, pa hetim, mbahet në arrest për llogari të pushtetit! Për së dyti, në këto 34 vjet, fati po sjell që liria e një shoqërie të rezonojë me emrin e Sali Berishës.
Shikojeni Qeverinë e Edi Ramës, shihni ministrat e tij me portofol, a nuk ju fyejnë inteligjencën me paturpësinë e tyre, a nuk ju shqetësojnë me paaftësinë, a nuk ju zemërojnë me oreksin që kanë, a nuk ju lodhin me servilizmin e tyre të skajshëm?
Nuk vijnë në parlament, nuk flasin, fshihen, kanë frikë, mendojnë se do harrojmë!
Të gjithë ne, shoqëria jonë, duhet të marrim përgjegjësi, nderin e të qenit opozitar në kohë të vështira duhet ta shndërrojmë në energji për fitore, në përpjekje që të jenë sa më të paktën ata që bien në fajin e votës për Edi Ramën dhe qeverinë e tij kumbare të skandalit!”
