Nga sot deri më 9 prill, Shqipëria do të jetë vendi pritës i Takimit të 70-të të Komisionit për Evropën të Organizatës Botërore të Turizmit, një ngjarje me rëndësi historike jo vetëm për fushën e turizmit, por edhe si një organizim i nivelit të lartë të UNWTO që mbahet për herë të parë në vendin tonë.

Kryeministri Edi Rama dhe Ministria e Turizmit Mirela Kumbaro do të marrin pjesë në mbledhjen e 70-të të Komisionit për Evropën të UNWTO. Delegacionet e UNWTO janë mbërritur në Shqipëri dhe përfaqësohen nga Sekretari i Përgjithshëm i organizatës, Zurab Pololikashvili, Drejtoresha Ekzekutive e UN Tourism Natalia Bayona, si dhe ministra të Turizmit dhe përfaqësues të lartë të këtij sektori nga 40 vende të Europës. Konferenca për Investimet në turizëm do të mbahet më 9 prill, duke prezantuar udhëzuesin “Tourism Doing Business: Investing in Albania” nëpërmjet një ceremonie zyrtare.