Kryesia e Partisë Demokratike ka miratuar një rezolutë të rëndësishme për Reformën Zgjedhore, duke insistuar se nevojitet një sistem zgjedhor që siguron një garë të hapur, barazi në votë dhe përfshirjen e votës së diasporës. Ndër propozimet thelbësore janë Lista e hapura, Shqipëria një zonë zgjedhore, Mundësimi i votimit të diasporës, si dhe Votimi dhe numërimi elektronik.
Përmes një rezolute të publikuar, PD ka dalë në konfrontim të hapur me tendencat e shkaktuara nga opozita, e cila po tenton të rrëzojë vendimet e Gjykatës Kushtetuese dhe të pengojë komisionin për Reformën Zgjedhore. Nënvizon se këto veprime shkojnë kundër ndërtimit të shtetit të së drejtës dhe funksionimit të demokracisë.
Partia Demokratike e vlerëson këtë situatë si një kërcënim serioz për demokracinë dhe rendin ligjor dhe ka shprehur angazhimin e palëkundur për të forcuar institucionet demokratike dhe për të siguruar barazi para ligjit si parim kushtetues. Në këtë kornizë, PD ka rikonfirmuar mbështetjen për një sistem të drejtësisë të pavarur dhe për Reformën Zgjedhore që synon garancinë e barazisë, transparencën dhe përfshirjen e të gjithë qytetarëve.
Rezoluta e miratuar:
Kryesia e Partisë Demokratike të Shqipërisë, e mbledhur sot me datë 7 prill 2024, në përmbushje të përgjegjësive të veta politike dhe statutore, nën dritën e zhvillimeve më të fundit politike dhe institucionale, konstaton se:
– Reforma në drejtësi është duke dhënë rezultatet e para konkrete inkurajuese në luftën kundër korrupsionit, krimit të organizuar dhe dhënien fund të pandëshkueshmërisë;
– SPAK dhe GJKKO gëzojnë sot mbështetjen më të lartë dhe besimin më të madh publik;
– Për këto shkaqe Partia Socialiste dhe disa deputetë të zgjedhur me vota opozitare, janë bashkuar në akte parlamentare, të realizuara në mungesë të plotë të transparencës, si një përpjekje për të dekurajuar këto arritje, si dhe krijimin e një atmosfere politike që trysnon organet e reja të drejtësisë;
– Bashkimi i votave, si një front i konsoliduar, për të amnistuar veprat penale të korrupsionit dhe sinkronizimi i qëndrimeve kundër SPAK dhe organeve të reja të drejtësisë, janë akte të qarta në këtë drejtim;
Si dhe,
– Sabotimi i Komisionit të Reformës Zgjedhore, duke rrëzuar vendimet e Gjykatës Kushtetuese;
– Tentativa për mbajtjen në fuqi të sistemit të listave të mbyllura dhe përjashtimi nga e drejta e votës të shtetasve shqiptarë në diasporë;
Janë akte që minojnë ndërtimin e shtetit të së drejtës dhe demokracisë funksionale.
Partia Demokratike e Shqipërisë i konsideron këto zhvillime si një kërcënim për demokracinë dhe rendin ligjor.
Partia Demokratike shpreh me forcë angazhimin e saj të palëkundur për:
– Forcimin e institucioneve demokratike;
– Vendosjen e barazisë përpara ligjit si parim themelor kushtetues;
– Ndarjen e pushteteve, si garancia kryesore e një qeverisjeje të mirë dhe transparente;
– Mbështetjen e pakushtëzuar dhe pa rezerva për sistemin e drejtësisë, në përpjekjet kurajoze për rivendosjen e ligjshmërisë dhe dhënien fund të pandëshkueshmërisë;
– Një Sistem Zgjedhor që siguron garën e hapur, barazinë e votës dhe votën e diasporës, duke i qëndruar me vendosmëri propozimeve tona për:
– Lista të hapura;
– Shqipëria një zonë zgjedhore;
– Mundësimi i votimit të diasporës;
– Votimi dhe numërimi elektronik.
Partia Demokratike siguron opinionin publik se do të ndërmarrë çdo hap në mbrojtje të këtyre parimeve demokratike.
Partia Demokratike i rikonfirmon partnerëve ndërkombëtarë angazhimin e saj politik për të çuar përpara përpjekjet e përbashkëta për ndërtimin e shtetit të së drejtës dhe demokracisë funksionale.
