Kryebashkiaku Erion Veliaj dhe ministri i Turizmit, Mirela Kumbaro, pritën Sekretarin e Përgjithshëm të Organizatës Botërore të Turizmit për Europën, Zurab Pololikashvili, në vijim të mbledhjes së 70-të të kësaj organizate, që po zhvillohet në Tiranë, me pjesëmarrjen e përfaqësuesve të sektorit të turizmit nga 40 shtete të Europës.

Gjatë fjalës së tij, Veliaj propozoi krijimin e një Akademie të Turizmit për të përballuar fluksin e jashtëzakonshëm të vizitorëve në vendin tonë, por edhe në rajon.

“Dua të falenderoj gjithë skuadrën, por kemi edhe një lajm të mirë. Ashtu siç kishim modelin e Kolegjit të Europës, kemi një ide të re, për të krijuar një akademi ekselence të turizmit. Ne sot kemi një rritje të jashtëzakonshme dhe duhet të jemi të përgatitur për këtë. Se ndryshe do të përballonim sfida të tjera. Ne duhet të përgatitemi për të pasur drejtues ekzekutivë të hoteleve me 5 yje dhe resorteve që janë nga stafi shqiptar, edhe pse jemi të hapur për të gjithë ata të huaj që punojnë sot në Shqipëri. Por, ka ardhur koha që rajoni të bashkëpunojë ashtu si për Kolegjin e Europës, për stafet që do të na çojnë drejt Bashkimit Europian, sot do të bashkëpunojmë për stafet e ekselencës që do të menaxhojnë të gjithë biznesin e turizmit, që gjithmonë e më shumë për Shqipërinë, por edhe për rajonin, është një bekim i madh”, u shpreh Veliaj.