Kryeministri Edi Rama ka filluar një vizitë dy ditore në Francë, duke u pritur me ceremoni shtetërore nga presidenti Emmanuel Macron. Kjo vizitë shënon një moment historik në marrëdhëniet diplomatike mes dy vendeve, ndërsa synon rritjen e bashkëpunimit strategjik.

Gjatë vizitës, pritet që Rama dhe Macron të nënshkruajnë marrëveshje ndërqeveritare dhe memorandume mirëkuptimi mes dy vendeve, ndërsa do të mbajnë edhe një konferencë për shtyp. Kryeministri Rama do të zhvillojë takime të përqendruara në promovimin e potencialeve të investimeve në Shqipëri dhe në bashkëpunimin në fushën e teknologjisë dhe inovacionit.

Konkretisht, ditën e premte në orën 8.30, Kryeministri Rama do të zhvillojë një mëngjes pune me Unionin e Sipërmarrësve të Francës MEDEF, nën drejtimin e z. Jean-Paul Agon, president i grupit L’Oréal dhe i komitetit Francë-Shqipëri në MEDEF, me pjesëmarrjen e 35 përfaqësuesve të kompanive prestigjoze franceze, si dhe të ftuar të tjerë nga bota e biznesit. Gjatë takimit do të prezantohen disa nga fushat prioritare për investime në Shqipëri, me interes të ndërsjellë për të dy vendet dhe më pas kryeministri Rama do të zhvillojë takime individuale me drejtues të sipërmarrjeve pjesëmarrëse.

Pas këtyre takimeve, Rama do të pritet nga Macron dhe axhenda vijon në orën 16.00 me vizitën dhe takimet në STATION F, inkubatori më i madh në botë i startup-eve dhe inovacionit, si dhe me mbledhjen inauguruese të Këshillit të Inovacionit Francë-Shqipëri –CIFA, ku do të marrë pjesë edhe Sekretarja franceze e Shtetit për Industrinë Numerike, përfaqësues të ministrive franceze të Jashtme dhe të Ekonomisë, si edhe operatorë të ndryshëm franceze e shqiptarë në fushën e inovacionit.

Së bashku me Kryeministrin Rama pjesë e delegacionit qeveritar do të jenë Ministrja e Arsimit dhe Sportit Ogerta Manastirliu, Ministrja e Turizmit dhe Mjedisit Mirela Kumbaro, Ministri i Ekonomisë, Kulturës dhe Inovacionit Blendi Gonxhe, Ministri i Shtetit për Pushtetin Vendor Arbjan Mazniku, si dhe Ministrja e Shtetit për Administratën Publike dhe Antikorrupsionin Adea Pirdeni.