Një 47-vjeçar ka rënë në pranga në Vaun e Dejës në Shkodër, pasi i janë gjetur 2 mijë fara kanabisi. Ton allias Tonin Marku, banues në Gjirokastër, u kap në flagrancë gjatë një operacioni policor të koduar “First step”, i zhvilluar në bashkëpunim me Prokurorinë e Shkodrës.

Policia njoftoi se, pas një hetimi proaktiv, e ndjekur për disa javë, Ton Marku u kap me 2 mijë fara kanabisi me qëllim të shiteshin për kultivim. Materialet procedurale janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.

“Si rezultat i një hetimi proaktiv, të ndjekur për disa javë, në bashkëpunim me Prokurorinë e Shkodrës, pas informacioneve nga inteligjenca policore, për goditjen e një rasti të posedimit të farave të cannabisit që do të shiteshin me qëllim kultivimin, shërbimet e Komisariatit të Policisë Vau i Dejës finalizuan operacionin policor të koduar “First step”.
Gjatë operacionit u kap në flagrancë dhe u vu në pranga shtetasi Ton allias Tonin Marku, 47 vjeç, banues në Gjirokastër. Nga kontrolli fizik, shërbimet e Policisë i gjetën këtij shtetasi, 2000 fara cannabisi, të cilat synonte t’i shiste me qëllim kultivimin”, njofton policia.