Pas bojkotit, Partia Socialiste është rikthyer në mbledhjen e Komisionit Hetimor për rrjedhjen e të dhënave të sistemit TIMS. Palët kanë arritur dakordësinë dhe kanë miratuar kërkesat për informacion që do t’u dërgohen institucioneve përkatëse.

PS kishte bojkotuar mbledhjen e 15 prillit, duke argumentuar se kryetari Ervin Salianji po shkel ligjin duke miratuar vendime të njëanshme. Megjithatë, opozita dhe mazhoranca kanë arritur një konsensus, dhe kërkesat për informacion të miratuara sot janë harmonizuar me ekspertët.

Nënkryetari Toni Gogu ka deklaruar se PS është e vendosur të vijojë hetimin duke respektuar ligjin dhe larg retorikës politike. Kryetari Salianji ka theksuar se puna e komisionit është e vështirë të bllokohet dhe ka inkurajuar bashkëpunimin.

Deputeti socialist Nasip Naço ka shprehur kundërshtimin e tij për një pikë të kërkesës për informacion duke thënë se mund të bëhet presion ndaj Prokurorisë së Posaçme.

Deputetja Blerina Gjylameti ka ironizuar duke thënë se mbledhjen e radhës do ta mbajnë kur të ketë protestë nga opozita.

Kërkesat për informacion, të përgatitura nga ekspertët, do t’u dërgohen zyrtarëve të lartë të institucioneve për të Drejtën e Informimit dhe Mbrojtjen e të Dhënave Personale, ministrit të Brendshëm, drejtorit të Policisë së Shtetit, kreut të SPAK-ut, AKSIK-ut, si dhe Prokurorisë së Tiranës.

Kërkesat janë hartuar duke u kujdesur për të mos cenuar procesin e hetimit.