Policia Kufitare e Durrësit ka arrestuar shtetasin italian Roberto Basco për qëllime ekstradimi në Spanjë, ku është dënuar për trafik droge. Arrestimi u bë si rezultat i shkëmbimit të informacionit mes Interpol Tiranës dhe Interpol Madridit, në përfundim të operacionit ‘Porta’.
59-vjeçari ishte shpallur në kërkim ndërkombëtar pasi Gjykata e Madridit e kishte dënuar me 6 vite burgim në vitin 2019 për trafik të lëndëve narkotike dhe nga dënimi i ka mbetur për të kryer edhe 1 vit e 5 muaj burg.
Gjatë operacionit, shtetasi italian Roberto Basco u arrestua me qëllim ekstradimi në Spanjë. Ai ishte kapur më 26 shkurt 2019 në aeroportin e Madridit pasi në valixhet e tij ishin gjetur 7 pako me lëndë narkotike kokainë, me peshë totale rreth 5.6 kg, që ai kishte sjellë nga Kolumbia për t’i shitur në Spanjë.
Procedurat për ekstradimin e Roberto Basco drejt Spanjës vazhdojnë aktualisht.
