Erdgys Arrazi, akuzuar për shkaktimin e vetëvrasjes, ka refuzuar të japë detaje lidhur me marrëdhënien dhe akuzat e ngritura ndaj tij. Ai është treguar i ftohtë dhe i fjalëpak gjatë marrjes në pyetje, duke mohuar dhunën ndaj bashkëshortes dhe fëmijëve. Megjithatë, ai ka pranuar se ka pasur konflikte me bashkëshorten, por pa dhënë shumë detaje.

Nuk ka shfaqur asnjë ndjesi kur i është dhënë lajmi se gruaja dhe fëmijët janë hedhur në lumin Bunë. Denoncimi për zhdukjen e tyre është bërë nga motra e gruas, e cila ka informuar policinë për dhunën që ushtronte Erdgys Arrazi ndaj bashkëshortes dhe tre fëmijëve.

Policia e Shkodrës, në bashkëpunim me polumbarët e RENEA dhe shërbimet e tjera, po kryen kërkime nga ura e vjetër e lumit Buna deri në Velipojë, në përpjekje për të gjetur viktima të tjera të mundshme. Megjithatë, deri tani nuk janë gjetur shenja të dhunës në trupin e pajetë të 9-vjeçares që u gjet në lum.

Kërkimet për viktima të tjera vazhdojnë, ndërsa policia dhe prokuroria vazhdojnë punën për zbardhjen dhe dokumentimin e rrethanave të këtij rasti.

“Në lidhje me informacionin e dhënë më parë, për gjetjen në ujërat e lumit Buna, të trupit të pajetë të 9-vjeçares, ju informojmë se nga këqyrja paraprake e trupit të të miturës, në prani të ekspertit mjeko-ligjor, nuk janë konstatuar shenja dhune. Policia e Shkodrës, në drejtimin e Prokurorisë së Shkodrës, po vijon punen për zbardhjen dhe dokumentimin e rrethanave të këtij rasti”, njofton policia.